Baliw at Bilanggo

Pader na itim
Ang kanilang pagitan,
Manipis na hangin
Ang tanging ugnayan.

Mga isip ay nagtagpo
Sa kahong de kuryente.
Mga katauha’y nagbunggo
Sa gitna ng mga kable.

Mahabang kurdon
Ang naging daluyan
Ng dalawang puwersang
Ikinulong sa karimlan.

Ang sala ng una,
Pagtalikod sa kamalayan.
Napiit ang ikalawa,
Sa pagkitil ng nadarama.

Sabay na humagod
Sa rehas na kalawangin,
Iisa ang sukat
Ng seldang nais lisanin.

Sa paghigpit ng kadena,
Sinikil ang pagtangis
Ng tahimik na umaga.

Mga kaluluwang ligaw
Ay malaya na.